خمار اپنی انا کا اتر چکا کب کا

خمار اپنی انا کا اتر چکا کب کا

ترے حوالے تو میں خود کو کر چکا کب کا

وہ ایک لمحہ کہ جب تو ہی تو تھا پاس مرے

وہ ایک لمحۂ وحدت گزر چکا کب کا

یہ میں جو تجھ کو نظر آ رہا ہوں میں ہوں کہاں

میں خاک بن کے ہوا میں بکھر چکا کب کا

کہو کہ پھر سے اتارے وہ قلب میں نشتر

پرانا زخم مرے دل کا بھر چکا کب کا

یہ اور بات ابھی سانس کی ہے آمد و رفت

میں اپنے جسم کے اندر تو مر چکا کب کا

کہاں ہیں یاورؔ آشفتہ سر بلاؤ انہیں

نگار خانۂ مقتل سنور چکا کب کا