KHumar-e-mausam-e-KHushbu had-e-chaman mein khula

ḳhumār-e-mausam-e-ḳhushbū had-e-chaman meñ khulā

mirī ġhazal kā ḳhazāna tire badan meñ khulā

tum us kā husn kabhī us kī bazm meñ dekho

ki māhtāb sadā shab ke pairahan meñ khulā

ajab nasha thā magar us kī baḳhshish-e-lab meñ

ki yuuñ to ham se bhī kyā kyā na vo suḳhan meñ khulā

na pūchh pahlī mulāqāt meñ mizāj us kā

vo rañg rañg meñ simTā kiran kiran meñ khulā

badan kī chaap nigah kī zabāñ bhī hotī hai

ye bhed ham pe magar us kī anjuman meñ khulā

ki jaise abr havā kī girah se khul jaa.e

safar kī shaam mirā mehrbāñ thakan meñ khulā

kahūñ maiñ kis se nishānī thī kis masīhā kī

vo ek zaḳhm ki 'mohsin' mire kafan meñ khulā

KHumar-e-mausam-e-KHushbu had-e-chaman mein khula

meri ghazal ka KHazana tere badan mein khula

tum us ka husn kabhi us ki bazm mein dekho

ki mahtab sada shab ke pairahan mein khula

ajab nasha tha magar us ki baKHshish-e-lab mein

ki yun to hum se bhi kya kya na wo suKHan mein khula

na puchh pahli mulaqat mein mizaj us ka

wo rang rang mein simTa kiran kiran mein khula

badan ki chap nigah ki zaban bhi hoti hai

ye bhed hum pe magar us ki anjuman mein khula

ki jaise abr hawa ki girah se khul jae

safar ki sham mera mehrban thakan mein khula

kahun main kis se nishani thi kis masiha ki

wo ek zaKHm ki 'mohsin' mere kafan mein khula