KHush-fikr-o-KHush-mazaq-o-mohabbat-shiar log

ḳhush-fikr-o-ḳhush-mazāq-o-mohabbat-shi'ār log

ḳhvāb-o-ḳhayāl ho ga.e bāġh-o-bahār log

kāñToñ ko phuul phuul ko kahte haiñ ḳhaar log

ab aur kyā dikhā.eñge lail-o-nahār log

chhū kar diloñ ko jin ke na guzrī havā-e-dard

kaise uThā.eñge vo tire ġham kā baar log

kis kī nigāh-e-lutf kā ye faiz-e-ḳhās hai

maqtal se bhī guzar ga.e dīvāna-vār log

kaise qarīb aa.uuñ tire jān-e-ārzū

roke hue haiñ raah mirī ġham-gusār log

manzil se bad-gumāñ koī jaada se be-ḳhabar

kis mīr-e-kārvāñ pe kareñ e'tibār log

pahlū badal ke rah ga.ī phir hasrat-e-hayāt

bedār ho ke so ga.e phir dil-figār log

rahtā huuñ chup to hotī hai dil meñ ghuTan 'azīz'

iz.hār-e-ġham karūñ to kareñ sangsār log

KHush-fikr-o-KHush-mazaq-o-mohabbat-shi'ar log

KHwab-o-KHayal ho gae bagh-o-bahaar log

kanTon ko phul phul ko kahte hain KHar log

ab aur kya dikhaenge lail-o-nahaar log

chhu kar dilon ko jin ke na guzri hawa-e-dard

kaise uThaenge wo tere gham ka bar log

kis ki nigah-e-lutf ka ye faiz-e-KHas hai

maqtal se bhi guzar gae diwana-war log

kaise qarib aaun tere jaan-e-arzu

roke hue hain rah meri gham-gusar log

manzil se bad-guman koi jada se be-KHabar

kis mir-e-karwan pe karen e'tibar log

pahlu badal ke rah gai phir hasrat-e-hayat

bedar ho ke so gae phir dil-figar log

rahta hun chup to hoti hai dil mein ghuTan 'aziz'

izhaar-e-gham karun to karen sangsar log