خوش فکر و خوش مذاق و محبت شعار لوگ

خوش فکر و خوش مذاق و محبت شعار لوگ

خواب و خیال ہو گئے باغ و بہار لوگ

کانٹوں کو پھول پھول کو کہتے ہیں خار لوگ

اب اور کیا دکھائیں گے لیل و نہار لوگ

چھو کر دلوں کو جن کے نہ گزری ہوائے درد

کیسے اٹھائیں گے وہ ترے غم کا بار لوگ

کس کی نگاہ لطف کا یہ فیض خاص ہے

مقتل سے بھی گزر گئے دیوانہ وار لوگ

کیسے قریب آؤں ترے جان آرزو

روکے ہوئے ہیں راہ مری غم گسار لوگ

منزل سے بد گماں کوئی جادہ سے بے خبر

کس میر کارواں پہ کریں اعتبار لوگ

پہلو بدل کے رہ گئی پھر حسرت حیات

بیدار ہو کے سو گئے پھر دل فگار لوگ

رہتا ہوں چپ تو ہوتی ہے دل میں گھٹن عزیزؔ

اظہار غم کروں تو کریں سنگسار لوگ