KHush-rang parinde aae hain mausam par gulon ke sae hain

ḳhush-rang parinde aa.e haiñ mausam par guloñ ke saa.e haiñ

lo raqs ko ham bhī paañv meñ zanjīr pahan kar aa.e haiñ

har samt fazā meñ halchal hai ik shor bapā hai gulshan meñ

kuchh log qafas se chhūTe haiñ kuchh toḌ ke zindāñ aa.e haiñ

tārīkī phir tārīkī hai sunte sunte miT pā.egī

kuchh diip fasīl-e-shab pe magar yāroñ ne aaj jalā.e haiñ

is daur-e-jahāñ meñ ham-‘asro hai farq bahut in donoñ meñ

vo zaḳhm jo tum ne dekhe haiñ jo zaḳhm ki ham ne khaa.e haiñ

vo sub.h ke darvāze se abhī is shahr meñ din ke aayā hai

phir shaam ke rūThe shahzāde ko log manā kar laa.e haiñ

kuchh dā.ere dil meñ lahroñ ke uThte haiñ 'nafīs' āḳhir kyūñkar

is jhiil ke Thahre paanī meñ patthar ye kidhar se aa.e haiñ

KHush-rang parinde aae hain mausam par gulon ke sae hain

lo raqs ko hum bhi panw mein zanjir pahan kar aae hain

har samt faza mein halchal hai ek shor bapa hai gulshan mein

kuchh log qafas se chhuTe hain kuchh toD ke zindan aae hain

tariki phir tariki hai sunte sunte miT paegi

kuchh dip fasil-e-shab pe magar yaron ne aaj jalae hain

is daur-e-jahan mein ham-‘asro hai farq bahut in donon mein

wo zaKHm jo tum ne dekhe hain jo zaKHm ki hum ne khae hain

wo subh ke darwaze se abhi is shahr mein din ke aaya hai

phir sham ke ruThe shahzade ko log mana kar lae hain

kuchh daere dil mein lahron ke uThte hain 'nafis' aaKHir kyunkar

is jhil ke Thahre pani mein patthar ye kidhar se aae hain