KHushi apni luTa kar hum ko pachhtana nahin aata

ḳhushī apnī luTā kar ham ko pachhtānā nahīñ aatā

koī ġham pesh kartā hai to Thukrānā nahīñ aatā

nahīñ hai muttafiq vo terī bātoñ se to ai vā'iz

samajh lenā yahī ki tujh ko samjhānā nahīñ aatā

charāġhoñ ko bujhā kar kah rahe haiñ ahl-e-mahfil ab

ki marne sham' par kyoñ koī parvāna nahīñ aatā

mohabbat ham bhī karte haiñ magar iz.hār kī ḳhātir

garebāñ phaaḌ kar galiyoñ meñ chillānā nahīñ aatā

hameñ sharm-o-hayā kā dars aise log dete haiñ

ki jin ko apnī laġhzish pe bhī sharmānā nahīñ aatā

rivāyat se nahīñ haiñ munharif hargiz magar ham ko

purānī baat ko har baar dohrānā nahīñ aatā

hamārī 'umr guzrī hai 'ziyā' maujoñ se Takrā ke

kahā kis ne hameñ tūfāñ se Takrānā nahīñ aatā

KHushi apni luTa kar hum ko pachhtana nahin aata

koi gham pesh karta hai to Thukrana nahin aata

nahin hai muttafiq wo teri baaton se to ai wa'iz

samajh lena yahi ki tujh ko samjhana nahin aata

charaghon ko bujha kar kah rahe hain ahl-e-mahfil ab

ki marne sham' par kyon koi parwana nahin aata

mohabbat hum bhi karte hain magar izhaar ki KHatir

gareban phaD kar galiyon mein chillana nahin aata

hamein sharm-o-haya ka dars aise log dete hain

ki jin ko apni laghzish pe bhi sharmana nahin aata

riwayat se nahin hain munharif hargiz magar hum ko

purani baat ko har bar dohrana nahin aata

hamari 'umr guzri hai 'ziya' maujon se Takra ke

kaha kis ne hamein tufan se Takrana nahin aata