خوشی اپنی لٹا کر ہم کو پچھتانا نہیں آتا

خوشی اپنی لٹا کر ہم کو پچھتانا نہیں آتا

کوئی غم پیش کرتا ہے تو ٹھکرانا نہیں آتا

نہیں ہے متفق وہ تیری باتوں سے تو اے واعظ

سمجھ لینا یہی کہ تجھ کو سمجھانا نہیں آتا

چراغوں کو بجھا کر کہہ رہے ہیں اہل محفل اب

کہ مرنے شمع پر کیوں کوئی پروانہ نہیں آتا

محبت ہم بھی کرتے ہیں مگر اظہار کی خاطر

گریباں پھاڑ کر گلیوں میں چلانا نہیں آتا

ہمیں شرم و حیا کا درس ایسے لوگ دیتے ہیں

کہ جن کو اپنی لغزش پہ بھی شرمانا نہیں آتا

روایت سے نہیں ہیں منحرف ہرگز مگر ہم کو

پرانی بات کو ہر بار دہرانا نہیں آتا

ہماری عمر گزری ہے ضیاؔ موجوں سے ٹکرا کے

کہا کس نے ہمیں طوفاں سے ٹکرانا نہیں آتا