ḳhushī meñ bhī navā-sañj-e-fuġhāñ huuñ
zamīn-o-āsmāñ kā tarz-dāñ huuñ
maiñ apnī be-nishānī kā nishāñ huuñ
hujūm-e-mātam-e-umr-e-ravāñ huuñ
tire jaate hī merī ziist tohmat
nahīñ miltā patā apnā kahāñ huuñ
ġhubār-e-kārvān-e-mor hai ziist
ye ḳhatt-e-yār se āshufta-jāñ huuñ
nahīñ kuchh kaam baḳht-o-āsmāñ se
maiñ nākāmī meñ apnī kāmrāñ huuñ
nahīñ dam mārne kā dam aur us par
sarāpā sham.a saañ shakl-e-zabāñ huuñ
ḳhudā hī gar na de ma.ashūq-o-mai ko
to kyuuñ phir mohtasib se sargirāñ huuñ
vahāñ kā rañg-e-parrāñ āsmāñ hai
maiñ jis aalam kī tasvīr-e-gumāñ huuñ
koī āvāra mil jaa.e to pūchhūñ
kidhar se aayā huuñ jaatā kahāñ huuñ
nikal jaatā hai jī har aarzū par
pa.e-ḳhūn-e-javānī meñ javāñ huuñ
mirā ġham ishrat-e-rafta kā naġhma
ki misl-e-gard bū-e-kārvāñ huuñ
kavākib-hā-e-qismat āsmāñ par
na huuñ... kyuuñ nukta-chīñ maiñ nukta-dāñ huuñ
'qalaq' be-raunaqī raunaq hai merī
bahār-e-umr-e-hastī kī ḳhizāñ huuñ
KHushi mein bhi nawa-sanj-e-fughan hun
zamin-o-asman ka tarz-dan hun
main apni be-nishani ka nishan hun
hujum-e-matam-e-umr-e-rawan hun
tere jate hi meri zist tohmat
nahin milta pata apna kahan hun
ghubar-e-karwan-e-mor hai zist
ye KHatt-e-yar se aashufta-jaan hun
nahin kuchh kaam baKHt-o-asman se
main nakaami mein apni kaamran hun
nahin dam marne ka dam aur us par
sarapa shama san shakl-e-zaban hun
KHuda hi gar na de mashuq-o-mai ko
to kyun phir mohtasib se sargiran hun
wahan ka rang-e-parran aasman hai
main jis aalam ki taswir-e-guman hun
koi aawara mil jae to puchhun
kidhar se aaya hun jata kahan hun
nikal jata hai ji har aarzu par
pae-KHun-e-jawani mein jawan hun
mera gham ishrat-e-rafta ka naghma
ki misl-e-gard bu-e-karwan hun
kawakib-ha-e-qismat aasman par
na hun kyun nukta-chin main nukta-dan hun
'qalaq' be-raunaqi raunaq hai meri
bahaar-e-umr-e-hasti ki KHizan hun
Source:
Kulliyat-e-Qalaq (Pg. ebook-266 page-188)
-
Author:
Qalaq Merathi
-
- Edition: 1966
- Publisher: Syed Imtiyaz Ali Taj, Majlis-e-Taraqqi-e-Adab, Lahore
- Year of Publication: 1966
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.