KHushi ye kam to nahin gham se rasm-o-rah to hai

ḳhushī ye kam to nahīñ ġham se rasm-o-rāh to hai

ḳhudā kā shukr koī merā ḳhair-ḳhvāh to hai

balā se saath na degī ye sham' saath na de

anīs-e-shām-e-judā.ī dil-e-tabāh to hai

hazār kaalī ghaTāoñ meñ chhup ga.e taare

mirī nazar meñ koī rashk-e-mehr-o-māh to hai

maiñ un ke sāmne jā.ūñ to kis tarah jā.ūñ

ki dil ko hosh nahīñ jur.at-e-nigāh to hai

vo haal dil kā na samjheñ ye un kī baat rahī

ab un ke sāmne hāl-e-dil-e-tabāh to hai

unheñ yaqīn na aa.e to kyā kare koī

mirī vafā kī mirī zindagī gavāh to hai

'aqīl' laakh nazāre mirī nazar ke liye

tasavvurāt meñ raushan vo jalva-gāh to hai

KHushi ye kam to nahin gham se rasm-o-rah to hai

KHuda ka shukr koi mera KHair-KHwah to hai

bala se sath na degi ye sham' sath na de

anis-e-sham-e-judai dil-e-tabah to hai

hazar kali ghaTaon mein chhup gae tare

meri nazar mein koi rashk-e-mehr-o-mah to hai

main un ke samne jaun to kis tarah jaun

ki dil ko hosh nahin jurat-e-nigah to hai

wo haal dil ka na samjhen ye un ki baat rahi

ab un ke samne haal-e-dil-e-tabah to hai

unhen yaqin na aae to kya kare koi

meri wafa ki meri zindagi gawah to hai

'aqil' lakh nazare meri nazar ke liye

tasawwuraat mein raushan wo jalwa-gah to hai