KHushnuma dhun pe raqam dard ke naghmat sa tha

ḳhushnumā dhun pe raqam dard ke naġhmāt sā thā

vaqt-e-ruḳhsat bhī junūñ pahlī mulāqāt sā thā

jism ke dasht meñ raqsāñ the mahakte hue zaḳhm

kal shab-e-hijr kā aalam shab-e-bārāt sā thā

dil ke dariyā meñ thiraktā thā tirī yaad kā chāñd

shab ke hoñToñ pe tirā zikr munājāt sā thā

maiñ to ik umr faqat us ke ta.āqub meñ rahā

jo mirī zaat meñ maujūd tirī zaat sā thā

lams-e-āḳhir mire kashkol-e-badan kī ḳhātir

ek muflis ko mayassar huī ḳhairāt sā thā

maiñ tire shoḳh laboñ par to abhī aayā huuñ

is se pahle tirī āñkhoñ meñ savālāt sā thā

jagmagāte hue jugnū na ziyāñ hotā charāġh

raat meñ kuchh bhī na thā jis ko kaheñ raat sā thā

KHushnuma dhun pe raqam dard ke naghmat sa tha

waqt-e-ruKHsat bhi junun pahli mulaqat sa tha

jism ke dasht mein raqsan the mahakte hue zaKHm

kal shab-e-hijr ka aalam shab-e-baraat sa tha

dil ke dariya mein thirakta tha teri yaad ka chand

shab ke honTon pe tera zikr munajat sa tha

main to ek umr faqat us ke taaqub mein raha

jo meri zat mein maujud teri zat sa tha

lams-e-aKHir mere kashkol-e-badan ki KHatir

ek muflis ko mayassar hui KHairaat sa tha

main tere shoKH labon par to abhi aaya hun

is se pahle teri aankhon mein sawalat sa tha

jagmagate hue jugnu na ziyan hota charagh

raat mein kuchh bhi na tha jis ko kahen raat sa tha