KHubiyon mein nahin kuchh daulat-o-zar ki KHubi

ḳhūbiyoñ meñ nahīñ kuchh daulat-o-zar kī ḳhūbī

ādamiyat se hai duniyā meñ bashar kī ḳhūbī

karte haiñ nīm-nigah meñ vo sunā mas ko tilā

hai ye adnā nazar-e-ahl-e-nazar kī ḳhūbī

be-samar sabz huī shāḳh to kyā sabz huī

ho samar-dār ye hai shāḳh-e-shajar kī ḳhūbī

bad-maza aur hue shor-o-fuġhāñ se vo mire

dekh lī ham ne ye nāloñ ke asar kī ḳhūbī

naam hī naam suno un kā vo aaveñ na nazar

hai yahī bas dahan-e-tañg-o-kamar kī ḳhūbī

raunaq-e-hazrat-e-dehlī thī usī ke dam se

ba.ad marne ke khulī sab pe 'zafar' kī ḳhūbī

ho na iqbāl to de jalva-e-sad-aib-e-hunar

saath iqbāl ke hai 'aish' hunar kī ḳhūbī

KHubiyon mein nahin kuchh daulat-o-zar ki KHubi

aadamiyat se hai duniya mein bashar ki KHubi

karte hain nim-nigah mein wo suna mas ko tila

hai ye adna nazar-e-ahl-e-nazar ki KHubi

be-samar sabz hui shaKH to kya sabz hui

ho samar-dar ye hai shaKH-e-shajar ki KHubi

bad-maza aur hue shor-o-fughan se wo mere

dekh li hum ne ye nalon ke asar ki KHubi

nam hi nam suno un ka wo aawen na nazar

hai yahi bas dahan-e-tang-o-kamar ki KHubi

raunaq-e-hazrat-e-dehli thi usi ke dam se

baad marne ke khuli sab pe 'zafar' ki KHubi

ho na iqbaal to de jalwa-e-sad-aib-e-hunar

sath iqbaal ke hai 'aish' hunar ki KHubi