خوبیوں میں نہیں کچھ دولت و زر کی خوبی

خوبیوں میں نہیں کچھ دولت و زر کی خوبی

آدمیت سے ہے دنیا میں بشر کی خوبی

کرتے ہیں نیم نگہ میں وہ سنا مس کو طلا

ہے یہ ادنیٰ نظر اہل نظر کی خوبی

بے ثمر سبز ہوئی شاخ تو کیا سبز ہوئی

ہو ثمر دار یہ ہے شاخ شجر کی خوبی

بد مزہ اور ہوئے شور‌ و فغاں سے وہ مرے

دیکھ لی ہم نے یہ نالوں کے اثر کی خوبی

نام ہی نام سنو ان کا وہ آویں نہ نظر

ہے یہی بس دہن تنگ و کمر کی خوبی

رونق حضرت دہلی تھی اسی کے دم سے

بعد مرنے کے کھلی سب پہ ظفرؔ کی خوبی

ہو نہ اقبال تو دے جلوۂ صد عیب ہنر

ساتھ اقبال کے ہے عیشؔ ہنر کی خوبی