خواب اک میں نے یوں بھی دیکھا ہے

خواب اک میں نے یوں بھی دیکھا ہے

میرے لب ہیں اور اس کا ماتھا ہے

بات کرنے کے سو طریقے ہیں

کچھ نہ کہنا بھی اک طریقہ ہے

میری مجبوریاں تو ظاہر ہیں

آپ کو کس نے روک رکھا ہے

ملتے جلتے رہا کرو یارو

مجھ کو تنہائیوں سے خطرہ ہے

حوصلہ رکھ یقین کر میرا

دشت سے دو قدم پہ دریا ہے

پہلے سننا سمجھنا پھر کہنا

گفتگو کا یہی سلیقہ ہے

یہ پرندہ تو اڑ گیا ہوتا

اک تصور نے باندھ رکھا ہے

دور آئے گا تیرا میرے عزیزؔ

دور آنے میں وقت لگتا ہے