KHwab kya hain sharab ki jhilen

ḳhvāb kyā haiñ sharāb kī jhīleñ

niiñd aa.e to ham zarā pī leñ

ek sūraj hazār-hā kirneñ

khul ga.ī haiñ hayāt kī rīleñ

tez maġhrib kī ho ga.ī hai havā

thartharāne lagī haiñ qindīleñ

shahr kī gard hī lipaT jaa.e

koī apnā mile to ham jī leñ

fart-e-ġham se chaTaḳh ga.e alfāz

kaise nikleñgī ruuh se kīleñ

ye bhī ghar ho gayā hai nazr-e-fasād

is meñ rahtī thiiñ kuchh abābīleñ

baat apnī banegī kyā 'asrār'

zehn meñ rah ga.ī haiñ tāvīleñ

KHwab kya hain sharab ki jhilen

nind aae to hum zara pi len

ek suraj hazar-ha kirnen

khul gai hain hayat ki rilen

tez maghrib ki ho gai hai hawa

thartharane lagi hain qindilen

shahr ki gard hi lipaT jae

koi apna mile to hum ji len

fart-e-gham se chaTaKH gae alfaz

kaise niklengi ruh se kilen

ye bhi ghar ho gaya hai nazr-e-fasad

is mein rahti thin kuchh ababilen

baat apni banegi kya 'asrar'

zehn mein rah gai hain tawilen