خواہش کے راستے میں دیوار بن گیا ہے

خواہش کے راستے میں دیوار بن گیا ہے

اک خواب قافلے کا سالار بن گیا ہے

اک وہم تخت آرا پہلو میں ہے یقیں کے

یہ دل بھی چاہتوں کا دربار بن گیا ہے

اس عشق کی لگن میں دنیا کو تج دیا تھا

یہ عشق اب تو جاں کا آزار بن گیا ہے

یہ کیسی گفتگو ہے کیسا مکالمہ ہے

انکار بھی تمہارا اقرار بن گیا ہے

جس کی مشاورت سے بگڑا نظام ہستی

وہ شخص اب ہمارا غم خوار بن گیا ہے

خود سے گریز پا تھی لیکن کسے کے دم سے

میرا وجود کیسا دل دار بن گیا ہے

چاہت سے جو صنم تھا میں نے صدفؔ تراشا

میری اطاعتوں سے سرکار بن گیا ہے