kis etimad se ilzam dhar gae apne

kis e'timād se ilzām dhar ga.e apne

hamāre naam ko badnām kar ga.e apne

ab un ke naqsh-e-qadam rāstoñ meñ kyā DhūñDeñ

parā.ī manziloñ ko ham-safar ga.e apne

bahār ne kiyā mansūba-e-hinā-bandī

manāo jashn ki sab zaḳhm bhar ga.e apne

phir us ke ba.ad faqat maiñ thā merā saayā thā

jo dasht dasht the ham-rāh ghar ga.e apne

jab ek miir bhī ham-sā.e meñ mire royā

to ye gumāñ huā dīvār-o-dar ga.e apne

hameñ adū se ho 'mohsin' gila to kyūñkar ho

hamāre shahr ko vīrān kar ga.e apne

kis e'timad se ilzam dhar gae apne

hamare nam ko badnam kar gae apne

ab un ke naqsh-e-qadam raston mein kya DhunDen

parai manzilon ko ham-safar gae apne

bahaar ne kiya mansuba-e-hina-bandi

manao jashn ki sab zaKHm bhar gae apne

phir us ke baad faqat main tha mera saya tha

jo dasht dasht the ham-rah ghar gae apne

jab ek mir bhi ham-sae mein mere roya

to ye guman hua diwar-o-dar gae apne

hamein adu se ho 'mohsin' gila to kyunkar ho

hamare shahr ko viran kar gae apne