kis ka KHayal zehn ki gahraiyon mein hai

kis kā ḳhayāl zehn kī gahrā.iyoñ meñ hai

ik raushnī sī dasht kī pinhā.iyoñ meñ hai

jaltā diyā añdhere kī añgnā.iyoñ meñ hai

terā ḳhayāl bhī mirī tanhā.iyoñ meñ hai

kuchh to haiñ dil ke daaġh ujālā liye hue

kuchh rang zulf-e-shām kī rā'nā.iyoñ meñ hai

sangīt ko milā na ġhazal ko na giit ko

vo karb jo sukūt kī shahnā.iyoñ meñ hai

ye kaun thā jo mujh se ye kah kar guzar gayā

kaisā ye shor shaam se sahrā.iyoñ meñ hai

ik raushnī sī phail rahī hai sar-e-'sirāj'

kaisā kamāl ye tirī añgḌā.iyoñ meñ hai

kis ka KHayal zehn ki gahraiyon mein hai

ek raushni si dasht ki pinhaiyon mein hai

jalta diya andhere ki angnaiyon mein hai

tera KHayal bhi meri tanhaiyon mein hai

kuchh to hain dil ke dagh ujala liye hue

kuchh rang zulf-e-sham ki ra'naiyon mein hai

sangit ko mila na ghazal ko na git ko

wo karb jo sukut ki shahnaiyon mein hai

ye kaun tha jo mujh se ye kah kar guzar gaya

kaisa ye shor sham se sahraiyon mein hai

ek raushni si phail rahi hai sar-e-'siraj'

kaisa kamal ye teri angDaiyon mein hai