kis ke chamke chand se ruKHsar qaisar-bagh mein

kis ke chamke chāñd se ruḳhsār qaisar-bāġh meñ

chāñdnī hai sāya-e-dīvār qaisar-bāġh meñ

fil-haqīqat ye bhī kam gulzār-e-jannat se nahīñ

hūreñ phirtī haiñ sar-e-bāzār qaisar-bāġh meñ

paañv kā yaañ zikr kaisā saaf hai aisī zamīñ

dil phisalte haiñ dam-e-raftār qaisar-bāġh meñ

zer-e-shāḳh-e-gul agar sabza kabhī sone lagā

shor-e-bulbul ne kiyā bedār qaisar-bāġh meñ

itne patte bhī na hoñge gulshan-e-firdaus meñ

jis qadar phūloñ ke haiñ ambār qaisar-bāġh meñ

tishnigān-e-shauq haiñ shīrīñ-laboñ ke mehmāñ

baT rahā hai sharbat-e-dīdār qaisar-bāġh meñ

qatre shabnam ke rag-e-gul par dikhāte haiñ bahār

gundh rahe haiñ motiyoñ ke haar qaisar-bāġh meñ

sāya-e-bāl-e-humā kyā DhūñDhtā hai ai 'amīr'

baiTh zer-e-sāya-e-dīvār qaisar-bāġh meñ

kis ke chamke chand se ruKHsar qaisar-bagh mein

chandni hai saya-e-diwar qaisar-bagh mein

fil-haqiqat ye bhi kam gulzar-e-jannat se nahin

huren phirti hain sar-e-bazar qaisar-bagh mein

panw ka yan zikr kaisa saf hai aisi zamin

dil phisalte hain dam-e-raftar qaisar-bagh mein

zer-e-shaKH-e-gul agar sabza kabhi sone laga

shor-e-bulbul ne kiya bedar qaisar-bagh mein

itne patte bhi na honge gulshan-e-firdaus mein

jis qadar phulon ke hain ambar qaisar-bagh mein

tishnigan-e-shauq hain shirin-labon ke mehman

baT raha hai sharbat-e-didar qaisar-bagh mein

qatre shabnam ke rag-e-gul par dikhate hain bahaar

gundh rahe hain motiyon ke haar qaisar-bagh mein

saya-e-baal-e-huma kya DhunDhta hai ai 'amir'

baiTh zer-e-saya-e-diwar qaisar-bagh mein