kis ke kahe pe tujhko ata ho raha hun main

kis ke kahe pe tujh ko 'atā ho rahā huuñ maiñ

kyā qarz huuñ koī ki adā ho rahā huuñ maiñ

koī namāz-e-'ishq kī detā nahīñ azaan

ai sā'at-e-nihāl qazā ho rahā huuñ maiñ

hai ird-gird gūñjtī tanhā.ī kā hujūm

ḳhud-ḳhez ḳhāmushī kī sadā ho rahā huuñ maiñ

bhar dī ga.ī hai mujh meñ 'ajab shar-faroġh aag

mahshar nahīñ huuñ aur bapā ho rahā huuñ maiñ

is vaqt ġhaib se hai ta'alluq banā mirā

maujūd ke yaqīñ se rihā ho rahā huuñ maiñ

dene lagā huuñ jannat-o-dozaḳh ke hukm bhī

parvardigār rok ḳhudā ho rahā huuñ maiñ

haiñ ḳhvāhisheñ imaam se jab muḳhtalif mirī

kis vāste sharīk-e-du’ā ho rahā huuñ maiñ

'āsim' 'ajab mizāj-e-mohabbat meñ hai tazād

jis se huuñ ḳhush usī se ḳhafā ho rahā huuñ maiñ

kis ke kahe pe tujh ko 'ata ho raha hun main

kya qarz hun koi ki ada ho raha hun main

koi namaz-e-'ishq ki deta nahin azan

ai sa'at-e-nihaal qaza ho raha hun main

hai ird-gird gunjti tanhai ka hujum

KHud-KHez KHamushi ki sada ho raha hun main

bhar di gai hai mujh mein 'ajab shar-farogh aag

mahshar nahin hun aur bapa ho raha hun main

is waqt ghaib se hai ta'alluq bana mera

maujud ke yaqin se riha ho raha hun main

dene laga hun jannat-o-dozaKH ke hukm bhi

parwardigar rok KHuda ho raha hun main

hain KHwahishen imam se jab muKHtalif meri

kis waste sharik-e-du’a ho raha hun main

'asim' 'ajab mizaj-e-mohabbat mein hai tazad

jis se hun KHush usi se KHafa ho raha hun main