کس کی آنکھوں میں رقم دل کی حکایت کرتے

کس کی آنکھوں میں رقم دل کی حکایت کرتے

کوئی تھا ہی نہیں ایسا کہ محبت کرتے

اتنے مصروف تھے ہم خود میں کہ فرصت نہ ملی

دوست کرتے جو کسی کو تو عداوت کرتے

جب رسائی نہیں ممکن تھی تری خلوت تک

اور کیا کرتے اگر ہم نہ سیاست کرتے

تم نے چاہا نہ مداوائے غم شام فراق

ورنہ تم کچھ تو نہ آنے کی وضاحت کرتے

زیر لب نیم تبسم سے وہ دیتا تھا جواب

آنکھوں آنکھوں میں کبھی ہم جو شرارت کرتے

منتظر رہتی مری خاک بھی سر تا بہ قدم

تم کبھی آنکھ اٹھانے کی تو زحمت کرتے

شاید اگلی کسی منزل پہ کشادہ ہو زمیں

کٹ گئی عمر اسی سوچ میں ہجرت کرتے