کس کی موجودگی ہے کمرے میں

کس کی موجودگی ہے کمرے میں

اک نئی روشنی ہے کمرے میں

اس قدر خامشی ہے کمرے میں

ایک آواز سی ہے کمرے میں

کوئی گوشہ نہیں مری خاطر

کیا مری زندگی ہے کمرے میں

رنگ دی ہیں لہو سے دیواریں

آ کہ تیری کمی ہے کمرے میں

کوئی رستہ نہیں رہائی کا

وہ عجب گمرہی ہے کمرے میں

تو نہیں ہے تو تیری یادوں کی

دھند پھیلی ہوئی ہے کمرے میں

دیکھیے اور دیکھیے خود کو

ایک کھڑکی کھلی ہے کمرے میں

ایک باہر کی زندگی ہے مری

اور اک زندگی ہے کمرے میں