kis ko apna haal sunaen aap bataen

kis ko apnā haal sunā.eñ aap batā.eñ

kaise dil ko ham samjhā.eñ aap batā.eñ

aap kaheñ maiñ ba.ad meñ apnī kah lūñgī

aap kaheñ phir bhuul na jaa.eñ aap batā.eñ

aap kī is uktāhaT ko ab ham kyā samjheñ

kyā ab ham milne nahīñ aa.eñ aap batā.eñ

aap binā ab kaun hamāre naaz uThā.e

kis se rūTheñ kis ko satā.eñ aap batā.eñ

āñkheñ rasta takne par māmūr huiiñ haiñ

dil se kaise yaad miTā.eñ aap batā.eñ

boleñ aap pe koī qayāmat guzregī kyā

aap ke jaise ham ho jaa.eñ aap batā.eñ

farq kahāñ rah jā.egā phir ham donoñ meñ

ham bhī gar ehsān jatā.eñ aap batā.eñ

ḳhāmoshī ne sab kuchh hī to kah Daalā hai

boleñ naañ ab kyā batlā.eñ aap batā.eñ

aap ne ḳhud ko ḳhud hī shahr meñ aam kiyā hai

kyuuñ nahīñ ab ye log satā.eñ aap batā.eñ

kab tak tanhā qaul nibhāte jā.eñge ham

kab tak hoñ majrūh vafā.eñ aap batā.eñ

mujh bechārī kā kahnā kis gintī meñ hai

aap bhale kuchh bhī farmā.eñ aap batā.eñ

ishq paḌā hai pīchhe haath hī dho kar jaise

kaise apnī jaan bachā.eñ aap batā.eñ

kaun 'rabāb' sune ab logoñ kī bātoñ ko

chhoḌeñ jo bhī log sunā.eñ aap batā.eñ

kis ko apna haal sunaen aap bataen

kaise dil ko hum samjhaen aap bataen

aap kahen main baad mein apni kah lungi

aap kahen phir bhul na jaen aap bataen

aap ki is uktahaT ko ab hum kya samjhen

kya ab hum milne nahin aaen aap bataen

aap bina ab kaun hamare naz uThae

kis se ruThen kis ko sataen aap bataen

aankhen rasta takne par mamur huin hain

dil se kaise yaad miTaen aap bataen

bolen aap pe koi qayamat guzregi kya

aap ke jaise hum ho jaen aap bataen

farq kahan rah jaega phir hum donon mein

hum bhi gar ehsan jataen aap bataen

KHamoshi ne sab kuchh hi to kah Dala hai

bolen nan ab kya batlaen aap bataen

aap ne KHud ko KHud hi shahr mein aam kiya hai

kyun nahin ab ye log sataen aap bataen

kab tak tanha qaul nibhate jaenge hum

kab tak hon majruh wafaen aap bataen

mujh bechaari ka kahna kis ginti mein hai

aap bhale kuchh bhi farmaen aap bataen

ishq paDa hai pichhe hath hi dho kar jaise

kaise apni jaan bachaen aap bataen

kaun 'rabab' sune ab logon ki baaton ko

chhoDen jo bhi log sunaen aap bataen