kis ko yaqin aaega yaro mera masiha qatil hai

kis ko yaqīn aa.egā yaaro merā masīhā qātil hai

dil ke saiñkaḌoñ armānoñ kā ek akelā qātil hai

jab tak mere ḳhūn-e-dil kī āñkhoñ se barsāt na ho

kaise pyaas bujhegī us kī ḳhuun kā pyāsā qātil hai

kaun samajh saktā hai us kī fitrat kī saffākī ko

chehra hai mā’sūmoñ jaisā bholā-bhālā qātil hai

shahr-e-nigārāñ meñ ab apne jān-o-dil kī ḳhair nahīñ

jo bhī nazar hai rahzan-e-dil hai chehra chehra qātil hai

ziist ke is 'ālam meñ apne qatl kā duuñ ilzām kise

din qātil haiñ rāteñ qātil lamha lamha qātil hai

halkā sā ehsās hai zaḳhmī ye to 'ziyā' kuchh baat nahīñ

ochhe vaar kare hai ham par zarf kā ochhā qātil hai

kis ko yaqin aaega yaro mera masiha qatil hai

dil ke sainkaDon armanon ka ek akela qatil hai

jab tak mere KHun-e-dil ki aankhon se barsat na ho

kaise pyas bujhegi us ki KHun ka pyasa qatil hai

kaun samajh sakta hai us ki fitrat ki saffaki ko

chehra hai ma’sumon jaisa bhola-bhaala qatil hai

shahr-e-nigaran mein ab apne jaan-o-dil ki KHair nahin

jo bhi nazar hai rahzan-e-dil hai chehra chehra qatil hai

zist ke is 'alam mein apne qatl ka dun ilzam kise

din qatil hain raaten qatil lamha lamha qatil hai

halka sa ehsas hai zaKHmi ye to 'ziya' kuchh baat nahin

ochhe war kare hai hum par zarf ka ochha qatil hai