کس کو یقین آئے گا یارو میرا مسیحا قاتل ہے

کس کو یقین آئے گا یارو میرا مسیحا قاتل ہے

دل کے سینکڑوں ارمانوں کا ایک اکیلا قاتل ہے

جب تک میرے خون دل کی آنکھوں سے برسات نہ ہو

کیسے پیاس بجھے گی اس کی خون کا پیاسا قاتل ہے

کون سمجھ سکتا ہے اس کی فطرت کی سفاکی کو

چہرہ ہے معصوموں جیسا بھولا بھالا قاتل ہے

شہر نگاراں میں اب اپنے جان و دل کی خیر نہیں

جو بھی نظر ہے رہزن دل ہے چہرہ چہرہ قاتل ہے

زیست کے اس عالم میں اپنے قتل کا دوں الزام کسے

دن قاتل ہیں راتیں قاتل لمحہ لمحہ قاتل ہے

ہلکا سا احساس ہے زخمی یہ تو ضیاؔ کچھ بات نہیں

اوچھے وار کرے ہے ہم پر ظرف کا اوچھا قاتل ہے