kis ne hamare shahr pe mari hai raushni

kis ne hamāre shahr pe maarī hai raushnī

har ik makāñ ke zaḳhm se jaarī hai raushnī

bach-bach ke chal rahā huuñ sitāroñ kī chaal se

ab tak mire havās pe taarī hai raushnī

dil ko mohabbatoñ se kiyā tū ne mālā-māl

ḳhush-bāsh tīrgī meñ utārī hai raushnī

ik raat har charāġh kī lau kaaT dī ga.ī

aur vo bhī chup rahe jinheñ pyārī hai raushnī

lazzat ko ek had pe Thaharne nahīñ diyā

tum ne badan ke paar guzārī hai raushnī

sāyoñ se Dar ke chīḳh paḌe the yahī to haiñ

in ko bhī zo'm hai ki hamārī hai raushnī

kis ne hamare shahr pe mari hai raushni

har ek makan ke zaKHm se jari hai raushni

bach-bach ke chal raha hun sitaron ki chaal se

ab tak mere hawas pe tari hai raushni

dil ko mohabbaton se kiya tu ne mala-mal

KHush-bash tirgi mein utari hai raushni

ek raat har charagh ki lau kaT di gai

aur wo bhi chup rahe jinhen pyari hai raushni

lazzat ko ek had pe Thaharne nahin diya

tum ne badan ke par guzari hai raushni

sayon se Dar ke chiKH paDe the yahi to hain

in ko bhi zo'm hai ki hamari hai raushni