کس نے ہمارے شہر پہ ماری ہے روشنی

کس نے ہمارے شہر پہ ماری ہے روشنی

ہر اک مکاں کے زخم سے جاری ہے روشنی

بچ بچ کے چل رہا ہوں ستاروں کی چال سے

اب تک مرے حواس پہ طاری ہے روشنی

دل کو محبتوں سے کیا تو نے مالا مال

خوش باش تیرگی میں اتاری ہے روشنی

اک رات ہر چراغ کی لو کاٹ دی گئی

اور وہ بھی چپ رہے جنہیں پیاری ہے روشنی

لذت کو ایک حد پہ ٹھہرنے نہیں دیا

تم نے بدن کے پار گزاری ہے روشنی

سایوں سے ڈر کے چیخ پڑے تھے یہی تو ہیں

ان کو بھی زعم ہے کہ ہماری ہے روشنی