kis qadar ziddi hain zid pe aD gae

kis qadar ziddī haiñ zid pe aḌ ga.e

aap to pīchhe hamāre paḌ ga.e

dostāna guftugū aur dil meñ kuchh

mere chehre ko vo shāyad paḌh ga.e

sochnā hogā hameñ 'ālam-panāh

lashkarī aapas meñ kaise laḌ ga.e

ye to honā thā huā afsos kyā

zard patte the havā se jhaḌ ga.e

vo mirī Thokar ke patthar the kabhī

taaj meñ jo aap ke haiñ jaḌ ga.e

ro'b thā jin kā thā jin kā dabdaba

vo manoñ miTTī ke nīche gaḌ ga.e

mujrimoñ ko to rihā.ī mil ga.ī

aur ham suulī pe 'saifī' chaḌh ga.e

kis qadar ziddi hain zid pe aD gae

aap to pichhe hamare paD gae

dostana guftugu aur dil mein kuchh

mere chehre ko wo shayad paDh gae

sochna hoga hamein 'alam-panah

lashkari aapas mein kaise laD gae

ye to hona tha hua afsos kya

zard patte the hawa se jhaD gae

wo meri Thokar ke patthar the kabhi

taj mein jo aap ke hain jaD gae

ro'b tha jin ka tha jin ka dabdaba

wo manon miTTi ke niche gaD gae

mujrimon ko to rihai mil gai

aur hum suli pe 'saifi' chaDh gae