kisi apne se hoti hai na begane se hoti hai

kisī apne se hotī hai na begāne se hotī hai

jo ulfat ek dīvāne ko dīvāne se hotī hai

subū se jaam se miinā se paimāne se hotī hai

mohabbat mai se ho kar saare mai-ḳhāne se hotī hai

koī qissa ho koī vāqi'a koī hikāyat ho

tasallī dil ko dard-e-dil ke afsāne se hotī hai

mirī tauba se kah do vo bhī aa kar shauq se sun le

'ajab āvāz paidā dil ke paimāne se hotī hai

nazar se chhupne vaale dil se āḳhir kyuuñ nahīñ chhupte

ye kaisī be-hijābī ā.ina-ḳhāne se hotī hai

bahār-e-chañd-roza se koī māñge to kyā māñge

ḳhizāñ ko bhī nadāmat haath phailāne se hotī hai

ghaTā.eñ ġham kī chhaT jaatī haiñ un ke muskurāne se

ki jaise sub.h paidā raat Dhal jaane se hotī hai

'figār' ehsās-e-dil meñ har taraf kāñTe hī kāñTe haiñ

yahī taskīn gulshan meñ bahār aane se hotī hai

kisi apne se hoti hai na begane se hoti hai

jo ulfat ek diwane ko diwane se hoti hai

subu se jam se mina se paimane se hoti hai

mohabbat mai se ho kar sare mai-KHane se hoti hai

koi qissa ho koi waqi'a koi hikayat ho

tasalli dil ko dard-e-dil ke afsane se hoti hai

meri tauba se kah do wo bhi aa kar shauq se sun le

'ajab aawaz paida dil ke paimane se hoti hai

nazar se chhupne wale dil se aaKHir kyun nahin chhupte

ye kaisi be-hijabi aaina-KHane se hoti hai

bahaar-e-chand-roza se koi mange to kya mange

KHizan ko bhi nadamat hath phailane se hoti hai

ghaTaen gham ki chhaT jati hain un ke muskurane se

ki jaise subh paida raat Dhal jaane se hoti hai

'figar' ehsas-e-dil mein har taraf kanTe hi kanTe hain

yahi taskin gulshan mein bahaar aane se hoti hai