kisi dil mein mere liye pyar kyun ho

kisī dil meñ mere liye pyaar kyuuñ ho

ye īsār hai aur īsār kyuuñ ho

tabāhī ho jab aarzū kā muqaddar

to dil is tabāhī se hushiyār kyuuñ ho

ye ḳhuddār honā hī laayā ḳharābī

mohabbat meñ insān ḳhuddār kyuuñ ho

koī apne hī ġham se ḳhālī kahāñ hai

jahāñ meñ koī merā ġham-ḳhvār kyuuñ ho

na pahlā sā milnā na aanā na jaanā

ab itne bhī tum mujh se bezār kyuuñ ho

isī kashmakash ne Duboyā jahāñ ko

unheñ jiit kyuuñ ho mujhe haar kyuuñ ho

jafā par nahīñ jab vo dil hī meñ nādim

nazar se nadāmat kā iz.hār kyuuñ ho

agar baḳhsh dene pe tayyār ho tum

mujhe jurm se apne inkār kyuuñ ho

kisi dil mein mere liye pyar kyun ho

ye isar hai aur isar kyun ho

tabahi ho jab aarzu ka muqaddar

to dil is tabahi se hushiyar kyun ho

ye KHuddar hona hi laya KHarabi

mohabbat mein insan KHuddar kyun ho

koi apne hi gham se KHali kahan hai

jahan mein koi mera gham-KHwar kyun ho

na pahla sa milna na aana na jaana

ab itne bhi tum mujh se bezar kyun ho

isi kashmakash ne Duboya jahan ko

unhen jit kyun ho mujhe haar kyun ho

jafa par nahin jab wo dil hi mein nadim

nazar se nadamat ka izhaar kyun ho

agar baKHsh dene pe tayyar ho tum

mujhe jurm se apne inkar kyun ho