kisi ka dard ho dil be-qarar apna hai

kisī kā dard ho dil be-qarār apnā hai

havā kahīñ kī ho siina figār apnā hai

ho koī fasl magar zaḳhm khul hī jaate haiñ

sadā-bahār dil-e-dāġh-dār apnā hai

balā se ham na piyeñ mai-kada to garm huā

ba-qadr-e-tishnagī ranj-e-ḳhumār apnā hai

jo shaad phirte the kal aaj chhup ke rote haiñ

hazār shukr ġham-e-pā.edār apnā hai

isī liye yahāñ kuchh log ham se jalte haiñ

ki jī jalāne meñ kyuuñ iḳhtiyār apnā hai

na tañg kar dil-e-mahzūñ ko ai ġham-e-duniyā

ḳhudā.ī-bhar meñ yahī ġham-gusār apnā hai

kahīñ milā to kisī din manā hī leñge use

vo zūd-ranj sahī phir bhī yaar apnā hai

vo koī apne sivā ho to us kā shikva karūñ

judā.ī apnī hai aur intizār apnā hai

na DhūñDh 'nāsir'-e-āshufta-hāl ko ghar meñ

vo bū-e-gul kī tarah be-qarār apnā hai

kisi ka dard ho dil be-qarar apna hai

hawa kahin ki ho sina figar apna hai

ho koi fasl magar zaKHm khul hi jate hain

sada-bahaar dil-e-dagh-dar apna hai

bala se hum na piyen mai-kada to garm hua

ba-qadr-e-tishnagi ranj-e-KHumar apna hai

jo shad phirte the kal aaj chhup ke rote hain

hazar shukr gham-e-paedar apna hai

isi liye yahan kuchh log hum se jalte hain

ki ji jalane mein kyun iKHtiyar apna hai

na tang kar dil-e-mahzun ko ai gham-e-duniya

KHudai-bhar mein yahi gham-gusar apna hai

kahin mila to kisi din mana hi lenge use

wo zud-ranj sahi phir bhi yar apna hai

wo koi apne siwa ho to us ka shikwa karun

judai apni hai aur intizar apna hai

na DhunDh 'nasir'-e-ashufta-haal ko ghar mein

wo bu-e-gul ki tarah be-qarar apna hai