kisi ka hone ki KHwahish na zid hai pane ki

kisī kā hone kī ḳhvāhish na zid hai paane kī

ki jab se chaal samajh aa.ī hai zamāne kī

ye terī zid kahīñ be-ghar na kar ke chhoḌe tujhe

purānī chhat pe 'imārat na.ī banāne kī

badan hī rāsta hai ruuh tak pahuñchne kā

'atā ho mujh ko ijāzat qadam baḌhāne kī

ham aise chāñd jise raushnī na mil paa.ī

vagarna chaah thī ham ko bhī jagmagāne kī

jo DhūñDte haiñ tujhe zindagī kī rāhoñ meñ

unheñ ḳhabar hī nahīñ hai tire Thikāne kī

har ik savāl pe mere tumhārī ḳhāmoshī

banā rahī hai saḌak mujh se duur jaane kī

mire qarīb the sab log shor ke 'aadī

sunā.ī detī kise ḳhāmushī divāne kī

kisi ka hone ki KHwahish na zid hai pane ki

ki jab se chaal samajh aai hai zamane ki

ye teri zid kahin be-ghar na kar ke chhoDe tujhe

purani chhat pe 'imarat nai banane ki

badan hi rasta hai ruh tak pahunchne ka

'ata ho mujh ko ijazat qadam baDhane ki

hum aise chand jise raushni na mil pai

wagarna chah thi hum ko bhi jagmagane ki

jo DhunDte hain tujhe zindagi ki rahon mein

unhen KHabar hi nahin hai tere Thikane ki

har ek sawal pe mere tumhaari KHamoshi

bana rahi hai saDak mujh se dur jaane ki

mere qarib the sab log shor ke 'adi

sunai deti kise KHamushi diwane ki