kisi ka yun to hua kaun umr-bhar phir bhi

kisī kā yuuñ to huā kaun umr-bhar phir bhī

na jaane kyuuñ thā yaqīñ tere pyaar par phir bhī

hazār baar mire dil ko us ne Thukrāyā

mujhe hai us se umīd-e-vafā magar phir bhī

tumhāre naqsh-e-qadam par gayā maiñ sar-ba-sujūd

kisī ke aage jhukāyā na thā ye sar phir bhī

maiñ us kī chaah meñ donoñ jahān chhoḌ chalā

vo bevafā na mirā ho sakā magar phir bhī

tumhārī bazm se nikle to phir milī na amaañ

bhaTakte phirte rahe garche dar-ba-dar phir bhī

na tū hī tū vo rahā aur na maiñ hī maiñ vo rahā

hai naqsh naam tirā mere qalb par phir bhī

maiñ apnī jaan bhī us par luTā ke dekh chukā

use aziiz rahā mujh se māl-o-zar phir bhī

maiñ tujh ko chhoḌ ke sar phoḌne kahāñ jā.ūñ

mire nasīb meñ hai terā sañg-e-dar phir bhī

banā sake na tire dil meñ apnā ghar 'ārif'

luTā diyā tirī chāhat meñ apnā ghar phir bhī

kisi ka yun to hua kaun umr-bhar phir bhi

na jaane kyun tha yaqin tere pyar par phir bhi

hazar bar mere dil ko us ne Thukraya

mujhe hai us se umid-e-wafa magar phir bhi

tumhaare naqsh-e-qadam par gaya main sar-ba-sujud

kisi ke aage jhukaya na tha ye sar phir bhi

main us ki chah mein donon jahan chhoD chala

wo bewafa na mera ho saka magar phir bhi

tumhaari bazm se nikle to phir mili na aman

bhaTakte phirte rahe garche dar-ba-dar phir bhi

na tu hi tu wo raha aur na main hi main wo raha

hai naqsh nam tera mere qalb par phir bhi

main apni jaan bhi us par luTa ke dekh chuka

use aziz raha mujh se mal-o-zar phir bhi

main tujh ko chhoD ke sar phoDne kahan jaun

mere nasib mein hai tera sang-e-dar phir bhi

bana sake na tere dil mein apna ghar 'arif'

luTa diya teri chahat mein apna ghar phir bhi