kisi ka yun to hua kaun umr bhar phir bhi

Firaq Gorakhpuri

kisi ka yun to hua kaun umr bhar phir bhi

Firaq Gorakhpuri

MORE BYFiraq Gorakhpuri

    kisī yuuñ to huā kaun umr bhar phir bhī

    ye husn o ishq to dhokā hai sab magar phir bhī

    hazār baar zamāna idhar se guzrā hai

    na.ī na.ī hai kuchh terī rahguzar phir bhī

    kahūñ ye kaise idhar dekh na dekh udhar

    ki dard dard hai phir bhī nazar nazar phir bhī

    ḳhushā ishāra-e-paiham zahe sukūt-e-nazar

    darāz ho ke fasāna hai muḳhtasar phir bhī

    jhapak rahī haiñ zamān o makāñ bhī āñkheñ

    magar hai qāfila āmāda-e-safar phir bhī

    shab-e-firāq se aage hai aaj merī nazar

    ki kaT jā.egī ye shām-e-be-sahar phir bhī

    kahīñ yahī to nahīñ kāshif-e-hayāt-o-mamāt

    ye husn o ishq ba-zāhir haiñ be-ḳhabar phir bhī

    palaT rahe haiñ ġharīb-ul-vatan palaTnā thā

    vo kūcha rū-kash-e-jannat ho ghar hai ghar phir bhī

    luTā huā chaman-e-ishq hai nigāhoñ ko

    dikhā gayā vahī kyā kyā gul o samar phir bhī

    ḳharāb ho ke bhī sochā kiye tire mahjūr

    yahī ki terī nazar hai tirī nazar phir bhī

    ho be-niyāz-e-asar bhī kabhī tirī miTTī

    vo kīmiyā sahī rah ga.ī kasar phir bhī

    lipaT gayā tirā dīvāna garche manzil se

    uḌī uḌī hai ye ḳhāk-e-rahguzar phir bhī

    tirī nigāh se bachne meñ umr guzrī hai

    utar gayā rag-e-jāñ meñ ye neshtar phir bhī

    ġham-e-firāq ke kushtoñ hashr kyā hogā

    ye shām-e-hijr to ho jā.egī sahar phir bhī

    fanā bhī ho ke girāñ-bārī-e-hayāt na pūchh

    uThā.e uTh nahīñ saktā ye dard-e-sar phir bhī

    sitam ke rañg haiñ har iltifāt-e-pinhāñ meñ

    karam-numā haiñ tire jaur sar-ba-sar phir bhī

    ḳhatā-muāf tirā afv bhī hai misl-e-sazā

    tirī sazā meñ hai ik shān-e-dar-guzar phir bhī

    agarche be-ḳhudī-e-ishq ko zamāna huā

    'firāq' kartī rahī kaam vo nazar phir bhī

    kisi ka yun to hua kaun umr bhar phir bhi

    ye husn o ishq to dhoka hai sab magar phir bhi

    hazar bar zamana idhar se guzra hai

    nai nai si hai kuchh teri rahguzar phir bhi

    kahun ye kaise idhar dekh ya na dekh udhar

    ki dard dard hai phir bhi nazar nazar phir bhi

    KHusha ishaara-e-paiham zahe sukut-e-nazar

    daraaz ho ke fasana hai muKHtasar phir bhi

    jhapak rahi hain zaman o makan ki bhi aankhen

    magar hai qafila aamada-e-safar phir bhi

    shab-e-firaq se aage hai aaj meri nazar

    ki kaT hi jaegi ye sham-e-be-sahar phir bhi

    kahin yahi to nahin kashif-e-hayat-o-mamat

    ye husn o ishq ba-zahir hain be-KHabar phir bhi

    palaT rahe hain gharib-ul-watan palaTna tha

    wo kucha ru-kash-e-jannat ho ghar hai ghar phir bhi

    luTa hua chaman-e-ishq hai nigahon ko

    dikha gaya wahi kya kya gul o samar phir bhi

    KHarab ho ke bhi socha kiye tere mahjur

    yahi ki teri nazar hai teri nazar phir bhi

    ho be-niyaz-e-asar bhi kabhi teri miTTi

    wo kimiya hi sahi rah gai kasar phir bhi

    lipaT gaya tera diwana garche manzil se

    uDi uDi si hai ye KHak-e-rahguzar phir bhi

    teri nigah se bachne mein umr guzri hai

    utar gaya rag-e-jaan mein ye neshtar phir bhi

    gham-e-firaq ke kushton ka hashr kya hoga

    ye sham-e-hijr to ho jaegi sahar phir bhi

    fana bhi ho ke giran-bari-e-hayat na puchh

    uThae uTh nahin sakta ye dard-e-sar phir bhi

    sitam ke rang hain har iltifat-e-pinhan mein

    karam-numa hain tere jaur sar-ba-sar phir bhi

    KHata-muaf tera afw bhi hai misl-e-saza

    teri saza mein hai ek shan-e-dar-guzar phir bhi

    agarche be-KHudi-e-ishq ko zamana hua

    'firaq' karti rahi kaam wo nazar phir bhi

    Videos
    This video is playing from YouTube

    Videos
    This video is playing from YouTube

    Jagjit Singh

    Jagjit Singh

    RECITATIONS

    Nomaan Shauque

    Nomaan Shauque

    Nomaan Shauque

    kisi ka yun to hua kaun umr bhar phir bhi Nomaan Shauque

    Source :
    • Book : Gul-e-Naghma (Pg. 95)
    • Author : Firaq Gorakhpuri
    • Publication : Maktaba Farogh-e-urdu Matia Mahal Jama Masjid Delhi (2006)
    • Edition : 2006
    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY