کسی کے غم میں شرکت چاہیئے تھی

کسی کے غم میں شرکت چاہیئے تھی

کسی کے غم سے فرصت چاہیئے تھی

مری آنکھوں کو راحت چاہیئے تھی

کسی صورت وہ صورت چاہیئے تھی

کسی کی تم کو صحبت چاہیئے تھی

ہمیں لیکن محبت چاہیئے تھی

تو ایسے وقت پر بچھڑا ہے مجھ سے

مجھے جب تیری قربت چاہیئے تھی

تجھے پانے کو جو بھی چاہیئے تھا

وہ سب تھا صرف قسمت چاہیئے تھی

ترے ہونے سے دقت ہے بہت ہے

مجھے لیکن یہ دقت چاہیئے تھی

فقط دیوار کو گھر کیسے کہتا

مرے سر پر مجھے چھت چاہیئے تھی

اجازت تھی نہیں رونے کی ہم کو

سو رونے کی اجازت چاہیئے تھی