kisi ke kaam aane lag gae hain

kisī ke kaam aane lag ga.e haiñ

so ham bhī kuchh kamāne lag ga.e haiñ

ye jhīleñ bhar ga.ī haiñ bārishoñ meñ

parinde āne-jāne lag ga.e haiñ

havā-e-shahr idhar bhī aa ga.ī hai

yahāñ bhī kār-ḳhāne lag ga.e haiñ

ye koyal gā rahī hai hijr apnā

so ham bhī gungunāne lag ga.e haiñ

vahī ik she'r mujh meñ saañs legā

jise kahte zamāne lag ga.e haiñ

shikārī daana le kar aa gayā hai

parinde phaḌphaḌāne lag ga.e haiñ

jahāñ ham dhuup se karte the bāteñ

vahāñ ab shāmiyāne lag ga.e haiñ

kisi ke kaam aane lag gae hain

so hum bhi kuchh kamane lag gae hain

ye jhilen bhar gai hain barishon mein

parinde aane-jaane lag gae hain

hawa-e-shahr idhar bhi aa gai hai

yahan bhi kar-KHane lag gae hain

ye koyal ga rahi hai hijr apna

so hum bhi gungunane lag gae hain

wahi ek she'r mujh mein sans lega

jise kahte zamane lag gae hain

shikari dana le kar aa gaya hai

parinde phaDphaDane lag gae hain

jahan hum dhup se karte the baaten

wahan ab shamiyane lag gae hain