کسی کے کام آنے لگ گئے ہیں

کسی کے کام آنے لگ گئے ہیں

سو ہم بھی کچھ کمانے لگ گئے ہیں

یہ جھیلیں بھر گئی ہیں بارشوں میں

پرندے آنے جانے لگ گئے ہیں

ہوائے شہر ادھر بھی آ گئی ہے

یہاں بھی کارخانے لگ گئے ہیں

یہ کوئل گا رہی ہے ہجر اپنا

سو ہم بھی گنگنانے لگ گئے ہیں

وہی اک شعر مجھ میں سانس لے گا

جسے کہتے زمانے لگ گئے ہیں

شکاری دانہ لے کر آ گیا ہے

پرندے پھڑپھڑانے لگ گئے ہیں

جہاں ہم دھوپ سے کرتے تھے باتیں

وہاں اب شامیانے لگ گئے ہیں