kisi ke naz uThana bhi ek ibaadat hai

kisī ke naaz uThānā bhī ik ibādat hai

kisī se ḳhud ko bachānā bhī ik ibādat hai

navā-e-sher-o-tarannum se nau-e-insāñ ke

diloñ meñ pyaar jagānā bhī ik ibādat hai

agar ho izn-e-takallum to arz hai nāseh

nazar se jaam pilānā bhī ik ibādat hai

fareb-e-husn se bachnā batā rahā huuñ tujhe

kisī ko raah dikhānā bhī ik ibādat hai

jahāñ ho vasl kī ummīd bulle-shah kī tarah

vahāñ pe nāchnā gaanā bhī ik ibādat hai

rah-e-vafā ke taqāze pe sochnā kaisā

vahāñ to ḳhud ko luTānā bhī ik ibādat hai

diloñ pe ġham kī ghaTā.eñ Thahar ga.ī hoñ jahāñ

unheñ to ḳhud pe hañsānā bhī ik ibādat hai

kahīñ kisī ko Dubonā bhī kār-e-ahsan hai

kisī ko paar lagānā bhī ik ibādat hai

jahāñ pe ruuTh ke jaane se baat bantī ho

vahāñ pe ruuTh ke jaanā bhī ik ibādat hai

jahāñ ThiThur ke mare jā rahī ho rūh-e-bashar

vahāñ pe ḳhud ko jalānā bhī ik ibādat hai

kise paḌī hai mashaqqat vahāñ kare ki jahāñ

kisī se maañg ke khānā bhī ik ibādat hai

kisī ko niiñd na aa.e to dilbarī se use

thapak thapak ke sulānā bhī ik ibādat hai

diloñ ko toḌ ke hañsnā jahāñ chalan ho vahāñ

kisī kā dil na dukhānā bhī ik ibādat hai

tumhāre dar kī taraf le chale jo raah mujhe

vahāñ to Thokareñ khānā bhī ik ibādat hai

tirā shikār hai 'shāhīñ' agar salīqe se

kisī ko maar ke khānā bhī ik ibādat hai

kisi ke naz uThana bhi ek ibaadat hai

kisi se KHud ko bachana bhi ek ibaadat hai

nawa-e-sher-o-tarannum se nau-e-insan ke

dilon mein pyar jagana bhi ek ibaadat hai

agar ho izn-e-takallum to arz hai naseh

nazar se jam pilana bhi ek ibaadat hai

fareb-e-husn se bachna bata raha hun tujhe

kisi ko rah dikhana bhi ek ibaadat hai

jahan ho wasl ki ummid bulle-shah ki tarah

wahan pe nachna gana bhi ek ibaadat hai

rah-e-wafa ke taqaze pe sochna kaisa

wahan to KHud ko luTana bhi ek ibaadat hai

dilon pe gham ki ghaTaen Thahar gai hon jahan

unhen to KHud pe hansana bhi ek ibaadat hai

kahin kisi ko Dubona bhi kar-e-ahsan hai

kisi ko par lagana bhi ek ibaadat hai

jahan pe ruTh ke jaane se baat banti ho

wahan pe ruTh ke jaana bhi ek ibaadat hai

jahan ThiThur ke mare ja rahi ho ruh-e-bashar

wahan pe KHud ko jalana bhi ek ibaadat hai

kise paDi hai mashaqqat wahan kare ki jahan

kisi se mang ke khana bhi ek ibaadat hai

kisi ko nind na aae to dilbari se use

thapak thapak ke sulana bhi ek ibaadat hai

dilon ko toD ke hansna jahan chalan ho wahan

kisi ka dil na dukhana bhi ek ibaadat hai

tumhaare dar ki taraf le chale jo rah mujhe

wahan to Thokaren khana bhi ek ibaadat hai

tera shikar hai 'shahin' agar saliqe se

kisi ko mar ke khana bhi ek ibaadat hai