کسی کے وعدۂ فردا پہ عمر ہار چلے

کسی کے وعدۂ فردا پہ عمر ہار چلے

ہم اک حسین تصور میں دن گزار چلے

دل و نگاہ تری اک نظر پہ وار چلے

ہزار شکر کہ صدقہ ترا اتار چلے

ترے بغیر بھی جینے کو ہم جئے تو مگر

یوںہی کہ جیسے بیاباں میں شب گزار چلے

یہ امتیاز ہے ساقی تو میکدے کو سلام

سنبھال ساغر و مینا کہ بادہ خوار چلے

ہم آ رہے ہیں چمن میں کہو پئے تعظیم

ادھر قفس سے چلیں ہم ادھر بہار چلے

حیات قرض تھی گویا وفا کی گردن پر

چلو یہ قرض بھی اہل وفا اتار چلے

مزاج یار بدلنا نہ تھا کبھی افضلؔ

ہم آج اپنی وفاؤں پہ شرمسار چلے