kisi ki aankh mein KHud ko talash karna hai

kisī kī aañkh meñ ḳhud ko talāsh karnā hai

phir us ke ba.ad hameñ ā.inoñ se Darnā hai

falak kī band galī ke faqīr haiñ tāre!

ki ghuum phir ke yahīñ se unheñ guzarnā hai

jo zindagī thī mirī jaan! tere saath ga.ī

bas ab to umr ke naqshe meñ vaqt bharnā hai

jo tum chalo to abhī do qadam meñ kaT jaa.e

jo fāsla mujhe sadiyoñ meñ paar karnā hai

to kyuuñ na aaj yahīñ par qayām ho jaa.e

ki shab qarīb hai āḳhir kahīñ Thaharnā hai

vo merā sail-e-talab ho ki terī ra.anā.ī

chaḌhā hai jo bhī samundar use utarnā hai

sahar huī to sitāroñ ne muuñd liiñ āñkheñ

vo kyā kareñ ki jinheñ intizār karnā hai

ye ḳhvāb hai ki haqīqat ḳhabar nahīñ 'amjad'

magar hai jiinā yahīñ par yahīñ pe marnā hai

kisi ki aankh mein KHud ko talash karna hai

phir us ke baad hamein aainon se Darna hai

falak ki band gali ke faqir hain tare!

ki ghum phir ke yahin se unhen guzarna hai

jo zindagi thi meri jaan! tere sath gai

bas ab to umr ke naqshe mein waqt bharna hai

jo tum chalo to abhi do qadam mein kaT jae

jo fasla mujhe sadiyon mein par karna hai

to kyun na aaj yahin par qayam ho jae

ki shab qarib hai aaKHir kahin Thaharna hai

wo mera sail-e-talab ho ki teri ranai

chaDha hai jo bhi samundar use utarna hai

sahar hui to sitaron ne mund lin aankhen

wo kya karen ki jinhen intizar karna hai

ye KHwab hai ki haqiqat KHabar nahin 'amjad'

magar hai jina yahin par yahin pe marna hai