kisi ki aankh mein rahta kisi ke dil mein rah jata

kisī kī aañkh meñ rahtā kisī ke dil meñ rah jaatā

ġhubār-e-ġham-zada uThtā to is mushkil meñ rah jaatā

liyā hai gāhe-gāhe naqsh-e-pā-e-yār kā bosa

na vo bāhar nikaltā ye bhī armāñ dil meñ rah jaatā

sabab se nā-tavānī ke na pahuñchā kū-e-jānāñ tak

jo maiñ ghar se nikaltā pahlī hī manzil meñ rah jaatā

zamāna haath phailātā hamiyyat tark kar detā

'adam kī raah meñ gar kuchh kaf-e-sā.il meñ rah jaatā

hamesha maiñ ḳhadang-e-nāz ko rakhtā huuñ siine meñ

mire dil se nikaltā dūsre ke dil meñ rah jaatā

hamāre ḳhūn-e-nāhaq kī shahādat hashr meñ detā

agar dhabba lahū kā ḳhanjar-e-qātil meñ rah jaatā

sunā hai baa'd mere aqrabā kī ġhair hālat thī

na merī maut aatī maiñ bhī is mushkil meñ rah jaatā

mirī dariyā-e-ġham meñ maut aa jaatī to ye hotā

bas ik tūfān uTh kar dāman-e-sāhil meñ rah jaatā

yaqīñ hai yuuñ taḌaptā saare 'ālam ko ḳhabar hotī

agar dam naam ko baaqī tire ghāyal meñ rah jaatā

milā hai ḳhaak meñ majnūñ suvārat saarī mehnat thī

koī zarra jo uḌ kar gosha-e-mahmil meñ rah jaatā

lagāyā haath puurā aur kahā jallād ne hañs kar

ye kyoñ armān ik baaqī dil-e-bismil meñ rah jaatā

gayā maiñ us kī sohbat meñ ḳhushī se maut aa jaatī

bahut achchhā thā merā zikr us mahfil meñ rah jaatā

yaqīñ hai baa'd mere phir kisī kā imtihāñ hotā

jo koī zulm baaqī āsmāñ ke dil meñ rah jaatā

ġhash aayā us ko aisā hashr kartā saare 'ālam meñ

jo kuchh bhī hosh baaqī aap ke ġhāfil meñ rah jaatā

'ayādat ko tire ahbāb gar kuchh bhī na aa paa.e

'shafīq' is baat kā armān tere dil meñ rah jaatā

kisi ki aankh mein rahta kisi ke dil mein rah jata

ghubar-e-gham-zada uThta to is mushkil mein rah jata

liya hai gahe-gahe naqsh-e-pa-e-yar ka bosa

na wo bahar nikalta ye bhi arman dil mein rah jata

sabab se na-tawani ke na pahuncha ku-e-jaanan tak

jo main ghar se nikalta pahli hi manzil mein rah jata

zamana hath phailata hamiyyat tark kar deta

'adam ki rah mein gar kuchh kaf-e-sail mein rah jata

hamesha main KHadang-e-naz ko rakhta hun sine mein

mere dil se nikalta dusre ke dil mein rah jata

hamare KHun-e-nahaq ki shahadat hashr mein deta

agar dhabba lahu ka KHanjar-e-qatil mein rah jata

suna hai ba'd mere aqraba ki ghair haalat thi

na meri maut aati main bhi is mushkil mein rah jata

meri dariya-e-gham mein maut aa jati to ye hota

bas ek tufan uTh kar daman-e-sahil mein rah jata

yaqin hai yun taDapta sare 'alam ko KHabar hoti

agar dam nam ko baqi tere ghayal mein rah jata

mila hai KHak mein majnun suwarat sari mehnat thi

koi zarra jo uD kar gosha-e-mahmil mein rah jata

lagaya hath pura aur kaha jallad ne hans kar

ye kyon arman ek baqi dil-e-bismil mein rah jata

gaya main us ki sohbat mein KHushi se maut aa jati

bahut achchha tha mera zikr us mahfil mein rah jata

yaqin hai ba'd mere phir kisi ka imtihan hota

jo koi zulm baqi aasman ke dil mein rah jata

ghash aaya us ko aisa hashr karta sare 'alam mein

jo kuchh bhi hosh baqi aap ke ghafil mein rah jata

'ayaadat ko tere ahbab gar kuchh bhi na aa pae

'shafiq' is baat ka arman tere dil mein rah jata