kisi ki rah ka patthar haTa raha hun abhi

kisī kī raah kā patthar haTā rahā huuñ abhī

safar ko aur bhī mushkil banā rahā huuñ abhī

use ye jaan kar achchhā bahut lagegā magar

maiñ us kī yaad meñ sab kuchh bhulā rahā huuñ abhī

maiñ saath apne hī saa.e kā chhoḌ duuñ na kahīñ

ki sar pe dhuup ġhamoñ kī uThā rahā huuñ abhī

hayāt tū bhī to dhoke se kam nahīñ lekin

fareb tere liye sab se khā rahā huuñ abhī

maiñ āñdhiyoñ se Darā kab ki aaj ghabrā.ūñ

to phir diye se diye kyuuñ jalā rahā huuñ abhī

mujhe paḌhe to koī kis tarah paḌhe 'bebāk'

maiñ ḳhud ko aab pe likh kar miTā rahā huuñ abhī

kisi ki rah ka patthar haTa raha hun abhi

safar ko aur bhi mushkil bana raha hun abhi

use ye jaan kar achchha bahut lagega magar

main us ki yaad mein sab kuchh bhula raha hun abhi

main sath apne hi sae ka chhoD dun na kahin

ki sar pe dhup ghamon ki uTha raha hun abhi

hayat tu bhi to dhoke se kam nahin lekin

fareb tere liye sab se kha raha hun abhi

main aandhiyon se Dara kab ki aaj ghabraun

to phir diye se diye kyun jala raha hun abhi

mujhe paDhe to koi kis tarah paDhe 'bebak'

main KHud ko aab pe likh kar miTa raha hun abhi