kisi ko dena to shohrat nikal kar dena

kisī ko denā to shohrat nikāl kar denā

baḌā 'ajīb hai sikka uchhāl kar denā

tamām shai pe tirā iḳhtiyār hai maulā

maiñ be-kamāl huuñ tū bā-kamāl kar denā

agar hai dil meñ ye ḳhvāhish ki naam zinda rahe

to aisā kaam koī be-misāl kar denā

mirā shajar hai zamāne se be-samar maulā

tū ab kī rut meñ samar Daal Daal kar denā

tamām 'umr kisī se javāb ban na paḌe

bahut samajh ke ik aisā savāl kar denā

añdherī rātoñ ko jo chāñdnī 'atā kar de

jo ho sake to vo motī nikāl kar denā

vafā ḳhulūs ke motī bahut hī nāzuk haiñ

ye tohfa denā to yaaro sañbhāl kar denā

kisi ko dena to shohrat nikal kar dena

baDa 'ajib hai sikka uchhaal kar dena

tamam shai pe tera iKHtiyar hai maula

main be-kamal hun tu ba-kamal kar dena

agar hai dil mein ye KHwahish ki nam zinda rahe

to aisa kaam koi be-misal kar dena

mera shajar hai zamane se be-samar maula

tu ab ki rut mein samar Dal Dal kar dena

tamam 'umr kisi se jawab ban na paDe

bahut samajh ke ek aisa sawal kar dena

andheri raaton ko jo chandni 'ata kar de

jo ho sake to wo moti nikal kar dena

wafa KHulus ke moti bahut hi nazuk hain

ye tohfa dena to yaro sanbhaal kar dena