کسی کو دینا تو شہرت نکال کر دینا

کسی کو دینا تو شہرت نکال کر دینا

بڑا عجیب ہے سکہ اچھال کر دینا

تمام شئے پہ ترا اختیار ہے مولا

میں بے کمال ہوں تو با کمال کر دینا

اگر ہے دل میں یہ خواہش کہ نام زندہ رہے

تو ایسا کام کوئی بے مثال کر دینا

مرا شجر ہے زمانے سے بے ثمر مولا

تو اب کی رت میں ثمر ڈال ڈال کر دینا

تمام عمر کسی سے جواب بن نہ پڑے

بہت سمجھ کے اک ایسا سوال کر دینا

اندھیری راتوں کو جو چاندنی عطا کر دے

جو ہو سکے تو وہ موتی نکال کر دینا

وفا خلوص کے موتی بہت ہی نازک ہیں

یہ تحفہ دینا تو یارو سنبھال کر دینا