کسی راہبر کی ہے جستجو کسی رہنما کی تلاش ہے

کسی راہبر کی ہے جستجو کسی رہنما کی تلاش ہے

جو شریک موج حیات ہو اسی ناخدا کی تلاش ہے

نہ رخ صنم کی ہے آرزو نہ در خدا کی تلاش ہے

جو شعور کرب عطا کرے اسی دل ربا کی تلاش ہے

میں جہاں رکوں میں جہاں رہوں ترا غم رہے مرا ہم سفر

یہی مدعا مری زندگی اسی مدعا کی تلاش ہے

بڑھی جب بھی یاس کی تیرگی ہوئیں گم نگاہ کی منزلیں

رہ زندگی جو دکھا سکے مجھے اس ضیا کی تلاش ہے

یہ سکوت لب یہ خموشیاں مری کاوشوں کا صلہ نہیں

جو دلوں کو سوز حیات دے اسی ہم نوا کی تلاش ہے

نہ حرم میں مجھ کو سکوں ملا نہ صنم کدے ہی میں راحتیں

جہاں زندگی کو یقیں ملے مجھے ایسی جا کی تلاش ہے

یہ نہ جانے کیسے ہیں پیشوا سر راہ ڈوبے گناہ میں

جو چھپا لے ان کے عیوب سب انہیں اس قبا کی تلاش ہے