kisi se kya kahen dukhDa hamara

kisī se kyā kaheñ dukhḌā hamārā

hamīñ par bas nahīñ chaltā hamārā

udāsī apnī sāthī hai azal se

bahut gahrā hai yārāna hamārā

hameñ kam āñkne vāloñ se kah do

vo pahle dekh leñ shajra hamārā

hamāre qahqahe par jā rahe haiñ

kisī ne dukh nahīñ samjhā hamārā

kisī se kyoñ kareñ koī gila ham

hamīñ se hai yahāñ jhagḌā hamārā

hamīñ meñ jazb hai ye saarī vus'at

hamīñ sāhil hamīñ dariyā hamārā

chhupā.e phirte haiñ chehre ko apne

ki koī paḌh na le chehra hamārā

achānak uTh ke ḳhud se pūchhte haiñ

ki us ne haath kyoñ chhoḌā hamārā

kisi se kya kahen dukhDa hamara

hamin par bas nahin chalta hamara

udasi apni sathi hai azal se

bahut gahra hai yarana hamara

hamein kam aankne walon se kah do

wo pahle dekh len shajra hamara

hamare qahqahe par ja rahe hain

kisi ne dukh nahin samjha hamara

kisi se kyon karen koi gila hum

hamin se hai yahan jhagDa hamara

hamin mein jazb hai ye sari wus'at

hamin sahil hamin dariya hamara

chhupae phirte hain chehre ko apne

ki koi paDh na le chehra hamara

achanak uTh ke KHud se puchhte hain

ki us ne hath kyon chhoDa hamara