کسی سے کیا کہیں دکھڑا ہمارا

کسی سے کیا کہیں دکھڑا ہمارا

ہمیں پر بس نہیں چلتا ہمارا

اداسی اپنی ساتھی ہے ازل سے

بہت گہرا ہے یارانہ ہمارا

ہمیں کم آنکنے والوں سے کہہ دو

وہ پہلے دیکھ لیں شجرہ ہمارا

ہمارے قہقہے پر جا رہے ہیں

کسی نے دکھ نہیں سمجھا ہمارا

کسی سے کیوں کریں کوئی گلہ ہم

ہمیں سے ہے یہاں جھگڑا ہمارا

ہمیں میں جذب ہے یہ ساری وسعت

ہمیں ساحل ہمیں دریا ہمارا

چھپائے پھرتے ہیں چہرے کو اپنے

کہ کوئی پڑھ نہ لے چہرہ ہمارا

اچانک اٹھ کے خود سے پوچھتے ہیں

کہ اس نے ہاتھ کیوں چھوڑا ہمارا