kitna kuchh us se chhupa jata hun main

kitnā kuchh us se chhupā jaatā huuñ maiñ

jis ke ghabrāne se ghabrātā huuñ maiñ

maiñ ne ḳhud se haar kab kī maan lī

ab to auroñ ko hī samjhātā huuñ maiñ

apnā ho.uuñ to nadāmat meñ marūñ

terā ho kar hī yuuñ itrātā huuñ maiñ

tere dekhe se bhaḌaktī hai ye lau

be-ruḳhī se maañd ho jaatā huuñ maiñ

sunñā paḌtā hai mujhe ye saarā shor

hosh-mandī kī sazā paatā huuñ maiñ

sochne lagtā huuñ us ke baare meñ

āgahī se jaañ chhuḌā jaatā huuñ maiñ

tum ko manzil kī havas hai tum chalo

kuchh samajh aatā hai to aatā huuñ maiñ

kab irāda vo badal leñ kyā pata

naqsh-e-pā to chhoḌ hī jaatā huuñ maiñ

kitna kuchh us se chhupa jata hun main

jis ke ghabrane se ghabraata hun main

main ne KHud se haar kab ki man li

ab to auron ko hi samjhata hun main

apna houn to nadamat mein marun

tera ho kar hi yun itraata hun main

tere dekhe se bhaDakti hai ye lau

be-ruKHi se mand ho jata hun main

sunna paDta hai mujhe ye sara shor

hosh-mandi ki saza pata hun main

sochne lagta hun us ke bare mein

aagahi se jaan chhuDa jata hun main

tum ko manzil ki hawas hai tum chalo

kuchh samajh aata hai to aata hun main

kab irada wo badal len kya pata

naqsh-e-pa to chhoD hi jata hun main