کتنا کچھ اس سے چھپا جاتا ہوں میں

کتنا کچھ اس سے چھپا جاتا ہوں میں

جس کے گھبرانے سے گھبراتا ہوں میں

میں نے خود سے ہار کب کی مان لی

اب تو اوروں کو ہی سمجھاتا ہوں میں

اپنا ہوؤوں تو ندامت میں مروں

تیرا ہو کر ہی یوں اتراتا ہوں میں

تیرے دیکھے سے بھڑکتی ہے یہ لو

بے رخی سے ماند ہو جاتا ہوں میں

سننا پڑتا ہے مجھے یہ سارا شور

ہوشمندی کی سزا پاتا ہوں میں

سوچنے لگتا ہوں اس کے بارے میں

آگہی سے جاں چھڑا جاتا ہوں میں

تم کو منزل کی ہوس ہے تم چلو

کچھ سمجھ آتا ہے تو آتا ہوں میں

کب ارادہ وہ بدل لیں کیا پتہ

نقش پا تو چھوڑ ہی جاتا ہوں میں