kitne mahan log jahan se guzar gae

kitne mahān log jahāñ se guzar ga.e

kyā chiiz haiñ ham aap ki jab vo bhī mar ga.e

ik gard uThī vabā kī chhaTī to nazar paḌī

haa.e vo aqrabā vo ahibbā kidhar ga.e

ġhairoñ ko kyā ḳhabar maze apnoñ se vasl ke

tum jaano maut is ko miyāñ ham to ghar ga.e

āḳhir khulā paḌā jo butoñ se mo.āmla

ham jī hī jī meñ ḳhush the ki lo ham sañvar ga.e

vaa.iz thā ḳhush ki kaan khaḌe va.az se hue

ghar se chale the ḳhar jo ga.e bhī to ḳhar ga.e

nazreñ nahīñ bachā.eñ to but-hā-e-marmarīñ

āñkhoñ kī raah se kahīñ dil meñ utar ga.e

ik bā-ḳhudā kī ḳhush-nazarī kaam kar ga.ī

aa.e the milne 'shāh' lagā ke nazar ga.e

kitne mahan log jahan se guzar gae

kya chiz hain hum aap ki jab wo bhi mar gae

ek gard uThi waba ki chhaTi to nazar paDi

hae wo aqraba wo ahibba kidhar gae

ghairon ko kya KHabar maze apnon se wasl ke

tum jaano maut is ko miyan hum to ghar gae

aaKHir khula paDa jo buton se moamla

hum ji hi ji mein KHush the ki lo hum sanwar gae

waiz tha KHush ki kan khaDe waz se hue

ghar se chale the KHar jo gae bhi to KHar gae

nazren nahin bachaen to but-ha-e-marmarin

aankhon ki rah se kahin dil mein utar gae

ek ba-KHuda ki KHush-nazari kaam kar gai

aae the milne 'shah' laga ke nazar gae