kitnon ne jaan war di hirni si chaal par

kitnoñ ne jaan vaar dī hirnī sī chaal par

kitne hī log mar miTe us ḳhush-ḳhisāl par

mujh ko ḳhabar milī hai ki pariyoñ ke des meñ

hote haiñ roz tabsire us ke jamāl par

maiñ bhī savāl pūchh ke ḳhāmosh ho gayā

us ne bhī chup hī saadh lī mere savāl par

bhañvrā kisī gulāb ko chhūtā hai jis tarah

rakhtā huuñ apne hoñT yuuñ dilbar ke gaal par

kis ke zarā se zikr pe sāñseñ mahak uThīñ

chehre ke rang khil uThe kis ke ḳhayāl par

paḌhte haiñ log aaj bhī ulfat kī dāstāñ

likhte haiñ log aaj bhī hijr-o-visāl par

chhānī haiñ us ne jā-ba-jā sahrā kī pastiyāñ

pahuñchā hai ishq phir kahīñ auj-e-kamāl par

haarā huuñ is dilerī se laḌtā huā 'zakī'

dushman bhī pur-malāl hai mere zavāl par

kitnon ne jaan war di hirni si chaal par

kitne hi log mar miTe us KHush-KHisal par

mujh ko KHabar mili hai ki pariyon ke des mein

hote hain roz tabsire us ke jamal par

main bhi sawal puchh ke KHamosh ho gaya

us ne bhi chup hi sadh li mere sawal par

bhanwra kisi gulab ko chhuta hai jis tarah

rakhta hun apne honT yun dilbar ke gal par

kis ke zara se zikr pe sansen mahak uThin

chehre ke rang khil uThe kis ke KHayal par

paDhte hain log aaj bhi ulfat ki dastan

likhte hain log aaj bhi hijr-o-visal par

chhani hain us ne ja-ba-ja sahra ki pastiyan

pahuncha hai ishq phir kahin auj-e-kamal par

haara hun is dileri se laDta hua 'zaki'

dushman bhi pur-malal hai mere zawal par